BOJXONA TO'LOVLARI UNDIRILMAYDIGAN POCHTA VA KURYERLIK JO'NATMALARINING YANGI NORMALARI TASDIQLANDI

Prezidentning 19.07.2018 yildagi «O'zbekiston Respublikasi bojxona hududiga jismoniy shaxslar nomiga xalqaro pochta va kuryerlik jo'natmalari orqali kelayotgan tovarlar nazoratini ta'minlash chora-tadbirlari to'g'risida»gi PQ–3873-son qarori e'lon qilindi.

Hujjat bilan quyidagi o'zgartirishlar kiritildi:

a) jismoniy shaxslar nomiga kelayotgan, bojxona to'lovlari undirilmaydigan tovarlar uchun jo'natma turiga: pochta va kuryerlik jo'natmasi orqali kelayotganligiga qarab cheklangan me'yorlar belgilandi. Ilgari pochta va kuryerlik jo'natmalari uchun yagona me'yor amal qilar edi – oyiga 1 000 AQSh dollari.

Ma'lumot uchun. Xalqaro pochta va kuryerlik jo'natmalarini bojxonada nazorat qilish qoidalariga muvofiq:

-xalqaro pochta jo'natmalari – tegishli o'ramda muayyan manzilga jo'natilgan yozma xat-xabarlar, posilkalar va bosma nashrlar;

-xalqaro kuryerlik jo'natmalari – qisqa muddatlarda qo'ldan qo'lga topshirgan holda etkazib beriladigan pochta kartochkalari, xatlar, banderollar, posilkalar, bosma nashrlar.

 b) xalqaro pochta va kurerlik jo'natmalari orqali yuridik shaxslar nomiga keladigan, bojxona to'lovlari undirilmaydigan tovarlarning qiymati belgilandi (quyidagi jadvalga qarang).

Jo’natmani qabul qiluvchi	Pochta jo’natmalari uchun cheklangan me’yorlar	Kuryerlik jo’natmalari cheklangan me’yor
Jismoniy shaxs	1 AQSH dollari	Bir chorakda 1000 AQSH dollari (ilgari – bir oyda 1000 AQSH dollari)
Yuridik shaxs	100 AQSH dollari

Monitoring qilish mexanizmini soddalashtirish maqsadida pochta aloqasi operatorlari va provayderlari zimmasiga xalqaro kuryerlik jo'natmalari orqali jismoniy shaxslar nomiga kelayotgan tovarlar to'g'risida ma'lumot berish majburiyati yuklatildi. Buning uchun quyidagi axborotni elektron tarzda oldindan taqdim etish imkonini beruvchi maxsus tizim joriy etiladi: qabul qiluvchining FIO, uning manzili, pasport seriyasi va raqami yoki STIR, shuningdek pochta aloqasi operatori yoki provayderining nomi, jo'natuvchi davlat, jo'natmaning tavsifi va uning qiymati.

Sentyabr oyiga kelib DBQ DSQ bilan birgalikda xalqaro kuryerlik jo'natmalari orqali kelayotgan tovarlarni qabul qiluvchini STIR yoki pasport ma'lumotlari orqali identifikatsiyalash imkonini beruvchi elektron bazalarning idoralararo integratsiyasi amalga oshirilishini ta'minlaydi.

Kirib kelayotgan xalqaro kurerlik jo'natmalarining bojxona nazorati va rasmiylashtiruvi:

 - temir yo'l va avtomobil transporti orqali etkazishda – maxsus belgilangan bojxona postlarida;

 - havo transporti orqali etkazishda – xalqaro aeroportlar yoki ularga yaqin hududlarda joylashgan bojxona postlarida amalga oshiriladi.

Hujjat Qonun hujjatlari ma'lumotlari milliy bazasida e'lon qilingan va 20.07.2018 yildan kuchga kirdi.